विवरे (प्रतिनिधी) — ग्रामीण भागातील शिक्षणव्रती परंपरा जपत विवरा शिक्षण विकास मंडळ संचालित श्री ग. गो. बेंडाळे हायस्कूल, विवरे येथे कै. गणपत गोविंदा बेंडाळे यांच्या पुतळ्याचे अनावरण केंद्रीय राज्यमंत्री रक्षाताई खडसे यांच्या हस्ते तर कै. गोदावरी वासुदेव पाटील यांच्या प्रतिमेचे अनावरण आमदार अमोल जावळे यांच्या हस्ते झाले. कार्यक्रमाचे अध्यक्षस्थान माजी खासदार डॉ. उल्हास पाटील यांनी भूषविले.
समारंभात संस्थेची गौरवपूर्ण वाटचाल मांडली गेली. संस्थेची स्मरणिका माजी आमदार शिरीष चौधरी यांनी तर गौरव विशेषांक माजी आमदार अरुण पाटील यांनी प्रकाशित केला.
उदार देणगींचा ओघ
शैक्षणिक कार्यासाठी कार्यक्रमात देणग्यांचा वर्षाव झाला.
स्मृ. शकुंतला बोरोले – ₹51,000
सौ. सिंधू पाटील – ₹51,000
स्मृ. विमल गुळवे – ₹21,000
शेख रफिक बिस्मिल्ला – ₹21,000
माजी सरपंच वासुदेव नरवाडे – ₹5,100
तसेच ₹5,001 चे गुप्त दान
ग्रामीण भागात शिक्षणासाठी अशी देणगी संस्कृती टिकून राहणे प्रेरणादायी असल्याचे मान्यवरांनी प्रतिपादन केले.
नवीन सुविधांची आश्वासने
आमदार अमोल जावळे यांनी अभ्यासिका तर रक्षाताई खडसे यांनी क्रीडांगण व व्यायामशाळेसाठी आवश्यक सुविधा उपलब्ध करून देण्याचे आश्वासन दिले. माजी आमदार शिरीष चौधरी, अरुण पाटील व अध्यक्षस्थानी असलेले डॉ. उल्हास पाटील यांनी संस्थेच्या कार्याचे कौतुक केले.
कै. बेंडाळे यांचा पुतळा साकार करणारे शिल्पकार गणेश छत्रे यांचा सत्कार झाला. शाळा विकासकामांसाठी योगदान देणाऱ्या मुक्तार मिस्तरी, हर्षल वाघ, राहुल महाजन, सोहम फेगडे व हर्षल राणे यांचाही गौरव करण्यात आला. कमलाबाई गर्ल्स हायस्कूलच्या मुख्याध्यापिका सौ. नीलिमा पुराणिक यांना Indian Talent Olympiad Best Principal Award मिळाल्याबद्दल विशेष सत्कार करण्यात आला.
मान्यवरांची उपस्थिती व सुरेख आयोजन
समारंभाला विविध शैक्षणिक, सामाजिक व सहकारी क्षेत्रातील मान्यवर, माजी नगराध्यक्ष, सरपंच, मुख्याध्यापक व माजी विद्यार्थी उपस्थित होते. सूत्रसंचालन सौ. निलिमा नेमाडे यांनी व आभार कु. तेजल भिरूड यांनी मानले. कार्यक्रमानंतर स्नेहभोजनाची व्यवस्था होती.
संस्था, शिक्षक, कर्मचारी, ग्रामस्थ व माजी विद्यार्थ्यांच्या संयुक्त परिश्रमांमुळे हा भव्य कार्यक्रम यशस्वीरीत्या पार पडला.
